Skip to main content
Feb 01
Love0

Kampaña di uso di vape pen

By Novedat

“Si bo ta riba VAPE; kidou bo n’ pèrdè SHAPE!”


Un kampaña di Fundashon pa Maneho di Adikshon (FMA) pa eduká i konsientisá tokante uso di vape pen na Kòrsou.

Ku bista riba e sifranan indikativo di FMA su enkuesta mas resien bou di hóbennan na Kòrsou, uso di vape pen a resultá di ta hopi presente bou di nos hubentut. 16% di hóbennan na Kòrsou tin nan propio vape pen i 41% a usa esaki den e delaster 6 lunanan (mará na periodo di e enkuesta).

Mas aleu, FMA ta ripará ku muchanan for di edat di 10 aña ya kaba ta eksperimentá ku vape pen sin ta konsiente di e posibel konsekuensianan. Esaki ta lokual e muchanan mes ta indiká na momento ku FMA bai diferente skol pa duna charla preventivo.

FMA ke logra un komunidat konsiente di e konsekuensianan di vape pen, alabes pa Kòrsou duna un konteksto hurídiko den forma di prohibishon pa menor di edat entre otro.

Kiko FMA ke men ku “pèrdè shape” den e lema?
Shape ta un palabra na ingles ku ta nifiká ‘forma’/ ‘figura’.
Un hóben ta den su proseso di forma su mes, su kurpa i mente tambe ta den proseso di formashon i desaroyo. Na momento ku droga/ vape pen keda introdusí na e kurpa, esaki ta influensiá desaroyo di e formashon; bo por pèrdè shape na un manera atraktivo bisá.

Pa e motibunan ariba menshoná, FMA a haña nesesario pa lansa e kampaña aki pa trese mas konsientisashon ku ta posibel pa ku uso di vape pen. Fma ta spera ku komunidat lo por realisá ku vape pen no ta asina inosente manera e ta mustra.

Sigui FMA riba Facebook i Instagram @FMAcuracao pa asina keda haña mas konosementu.
Por último, wak FMA durante Teener Parade djabièrnè 9 di febrüari 2024, for di 4’or di atardi.

“Si bo ta riba VAPE; kidou bo n’ pèrdè SHAPE!”

Jan 23
Love0

Vape

By Supstansianan adiktivo

‘Vape’

Hey.. kontá? Bo sa mira kuantu hende rondó di bo ta huma vapepen? Bo mes a yega di us’é of kisas bo ta kurioso pa sa kiko e ta? Awel korda informá bo mes bon. Sigui lesa akibou pa bo sa mas tokante vape. 

Vape pen, kiko e ta?

Vapepen ta un aparato chikitu elektróniko ku ta keinta un likido den un vapor/huma (aerosol)  ku ta wordu inhalá via di boka. Esaki ta wordu yamá ‘vaping’. Otro nòmbernan pa vapepen ta e-cigarette, puff bars, e-cigs, vape pods, mods. 

E aparato aki ta konsisití di un bateria, coil, katuna, e-liquid i un ‘driptip’ (kaminda ta pone e boka). 

Bo por hañe na diferente kolo, sabor i tamayo. Tin vapepen ku tin ku benta afó ora e kaba ku ta bini den difernte kantidat di pof. E vapepen aki ta wordu yama vapepod. E minimo ta 200 i nan por yega te ku 6000 pof. Tin vapepen ku por bolbe yena ku likido, ku tin un pantaya i diferente opshon pa bo mes stel temperatura i watt di e bateria. Esakinan meter remplasa su piesanan i nan ta mas duradero. E ta wordu yamá vapemod. 

E-liquid

Vape juice, e-juice, e-liquid ta e likido ku tin den e vapepen. E base di e likido aki mayoria bia sa kontene nikotina. Nikotina ta e stof adiktivo ku tin den sigaria. Banda di nikotina e likido aki ta kontene sabor, propylene glycol (PG) i vegetal glycerin (VG). Esakinan ta soru pa e sintimentu ku e humadó ta sinti den su garganta i tambe pa e kantidat di vapor ku ta sali for di e pen. E komponentenan aki bo por haña den produktonan di make up i tambe den coolant pa outo. 

Tin algun di e likidonan aki ku por yena e vapepen kuné ku tin nicotine salts den dje. E salu aki ta wordu pone den e e-liquid pa asina e aliviá e efekto skerpi ku e humadó ta sinti den su garganta i tambe pa e nikotina drenta mas lihe den e humadó su kurpa. Esaki por hasi humamentu di vape hopi adiktivo. 

Efektonan

Loke e humadó ta sinti ta kasi similar na loke un humadó di sigaria ta sinti. Efektonan ku e humadó por sinti ta kabes fofo, mariá, doló di kabes, kishikishi skerpi den garganta, relahá, alerta, gana di saka i tosamentu. Kurason ta kuminsá bati mas duru, preshon di sanger ta subi i ta hala rosea un tiki mas lihe. 

 Rísikonan

Adikshon 

Un di e risikonan di mas grandi ku un humadó di vape tin ta ku e por bira adikto na nikotina. Nikotina ta un di e droganan ku hopi lihe hende ta bira adikto na dje.
Ora e humadó haña hopi nikotina den su kurpa e por haña intoksikashon di nikotina. E humadó ta sintie intrankil, mariá, sakamentu i doló di barika.

 Pulmon i rosea

Dor di e kantidat di huma i e stofnan kimiko ku tin den e e-juice e humadó por tosa hopi i haña problema ku halamentu di rosea. Garganta ta iritá, slijm por bira mas diki, rosea por bira kortiku, pulmon por iritá i asta inflamá.

Vapers tongue

E PG (propylene glycol) ta seka bo boka i garganta. Dor di vape eksesivo e humadó por perde smak den su boka. Esaki yama ‘vapers tongue’. Dor di esaki e humadó por hole menos bon tambe. 

Doló di kabes

Doló di kabes ta bini dor di e nivel di nikotina i e kantidat grandi di huma ku e humadó ta haña den su kurpa.
Debí ku vapepen ta algu nobo tin mas investigashon ku mester wordu hasi pa wak kiko e risikonan ta riba termino largu pa un hende su salú.

Vapepen vs sigaria

Ora un hende ta huma sigaria e tabako ta wordu kimá i dor di esaki ter, koolstofmonoxide i miles di otro stofnan ku por ta kanseroso ta bin liber. Den un vapepen no tin tabako, pues e stofnan aki no ta presente. Esaki no ta nifiká ku e ta sin risiko. Paso den un vapepen tin bateria i diferente otro partinan kimiko di e bateria, coil i likido ku ta bin liber na momentu ku esakinan keinta i wordu inhalá. Kada un ta riba su kurpa i tin su propio dañonan i risikonan. un peliger mas ku e vapepen tin ta ku e humadó ta inhala mas tantu huma aden i huma mas frekuenta debí ku e ta kere ku e ta ‘inosente’.

Vapepen i hoben

Un hoben su kurpa ta de desaroyo i ku su 25 aña su seleber ta kaba di desaroyá kompletu. Si un hoben kuminsá vape na edat yon, mas chens e tin di krea un adikshon na nikotina. Asta si e no tin nikotina den dje e vape i e stofnan toksiko ku ta wordu inhalá tambe ta danino pa un hóben ku su pulmon ta den desaroyo. 

E vapepen originalmente a wordu trahá pa yuda humadónan di sigaria baha man of stop di huma sigaria. Esaki debi ku e humadó mes por skohe e kantidat di nikotina ku e ta huma. Pero segun temu e vapepen a bin ta desaroya i bira mas kolorido, atraktivo i fasil pa huma. 

Hey..

Bo tabata sa ku tin mas ku 7000 sabor di vapepen?

Bo tabata sa ku vapepen por eksplota?

Jan 11
Love0

Resultado di enkuesta 2023

By Novedat

𝗥𝗘𝗦𝗨𝗟𝗧𝗔𝗗𝗢 𝗗𝗜 𝗘𝗡𝗞𝗨𝗘𝗦𝗧𝗔 𝟮𝟬𝟮𝟯

“Kontá ku bo uso?”

𝗘𝗻𝗸𝘂𝗲𝘀𝘁𝗮 𝗯𝗼𝘂 𝗱𝗶 𝗵𝗼𝗯𝗲𝗻 𝘁𝗲 𝗸𝘂 𝟮𝟱 𝗮𝗻̃𝗮

Fundashon pa Maneho di Adikshon (FMA) komo e sentro di konosementu riba tereno di prevenshon, tratamentu i kuido pa ku adikshon ke a haña un bista riba uso di supstansia (droga) bou di hóbennan di Kòrsou.
Den e 𝘪𝘯𝘧𝘰𝘨𝘳𝘢𝘱𝘩𝘪𝘤 por mira resultado pa ku diferente droga.
Nos ta kouteloso pa mira e grupo komo representativo pa tur nos hóbennan na Kòrsou komo ku no a kontrolá sierto faktornan promé ku e enkuesta.
Pues, 𝗲 𝗿𝗲𝘀𝘂𝗹𝘁𝗮𝗱𝗼 𝘁𝗮 𝗱𝘂𝗻𝗮 𝘂𝗻 𝗶𝗻𝗱𝗶𝗸𝗮𝘀𝗵𝗼𝗻 di kiko ta e komportashon pa ku uso di droga bou di nos hóbennan aki na Kòrsou.
Mas aleu, mirando e echo ku aki na Kòrsou ta konosí komo un pais ku hopi kaso di personanan ku malesanan manera preshon haltu, diabetes, problema ku kurason, i mas, ta bon pa nos gobernantenan pone mas énfasis riba e protekshon di nos hóbennan dor di:
• limitá akseso na supstansiannan adiktivo,
• mara e benta na sierto leinan,
• kontrolá ku e leinan ta keda apliká efektivamente.
𝗕𝗼 𝘁𝗶𝗻 𝗽𝗿𝗲𝗴𝘂𝗻𝘁𝗮?
𝗚𝘂𝘀𝘁𝗼𝘀𝗮𝗺𝗲𝗻𝘁𝗲 𝗻𝗼𝘀 𝗹𝗼 𝗸𝗼𝗻𝘁𝗲𝘀𝘁𝗮́.
Jan 11
Love2

Reunion ku parlamento enkuanto ‘lachgas’ i ‘vape pen’

By Novedat

Djárason 10 di yanüari 2024, Fundashon pa Maneho di Adikshon (FMA) riba invitashon di parlamento di Kòrsou a deliberá i kompartí informashon enkuanto uso di ‘lachgas’ i ‘vape pen’ den nos komunidat i partikularmente bou di hóbennan.

FMA a keda representá pa Verda Betrian (Sikólogo, Manager di FMA) i Daniëlla Pengel (Trahadó Sosial, Kordinadó di departamentu ‘training & voorlichting’).

Algun aspekto ku a keda tratá tabata:

Mas aleu, parlamentarionan presente a duna elogio i ekspresá graditut pa e presentashon pa seguidamente hasi diferente pregunta aklaratorio.

FMA ta gradesí parlamento pa e invitashon i ta keda atento pa ku e desaroyonan (legal) pa ku uso di ‘lachgas’ i ‘vape pen’ aki na Kòrsou.

Video di reunion di komishon sentral

Aug 16
Love0

“Responsible Gaming”

By Novedat


De Inter-Continental University of the Caribbean (hierna: ICUC) onder leiding van prof. dr. ir Gilbert J. Cijntje gaat, in opdracht van de stichting Gaming Control Board (hierna: GCB), gaat een onderzoek doen naar het gokgedrag en de huidige gokproblematiek op Curaçao. De lokale experten op het gebied van verslavingszorg, de Fundashon pa Maneho di Adikshon (hierna: FMA) zullen ook hieraan bijdragen.

Op dinsdag 27 juni 2023 hebben beide partijen de overeenkomst van opdracht ondertekend. Naar verwachting zal het eindrapport voor het einde van dit jaar worden opgeleverd. Het laatste rapport over voornoemd onderwerp dateert van het jaar 2003 en het resultaat schiep het zorgwekkende beeld dat de Curaçaose gemeenschap destijds kampte met ernstige gokverslaving en de negatieve sociaal-maatschappelijke effecten daarvan.

Inmiddels, 20 jaar later, is vooralsnog onbekend of dit fenomeen is verergerd, afgenomen of onveranderd is gebleven. Vanwege het grote aanbod en de toegankelijkheid van kansspelen op het eiland is het cruciaal om te beschikken over actuele reële data om aan de hand hiervan, gokverslavingspreventieve oftewel ‘Responsible Gaming’ richtlijnen en beleid te ontwikkelen die toezien op een deugdelijke bescherming van consumenten (spelers), jongeren en kwetsbaren voor kansspelen. Een cruciale stap is genomen om de gokverslavingsproblematiek op Curaçao deugdelijk aan te pakken. De GCB is voornemen om binnenkort, vanuit het oogpunt van preventie, te beginnen met een bewustwordingscampagne die personen bewuster moet maken hoe verantwoord te gokken als hiervoor wordt gekozen en dat er reële risico’s bestaan, voor een ieder die deelneemt aan kansspelen, om een problematisch gokgedrag en-of een gokverslaving te ontwikkelen. 

De Stichting Gaming Control Board is de toezichthouder voor de land-based casino-industrie en de i-gaming sector op Curaçao en is de vergunningverlenende autoriteit voor o.a. alle loterijen, charitatief bingo en bon ku ne. Daarnaast is de GCB aangesteld als toezichthouder voor de kansspelindustrie op Curaçao v.w.b. de naleving van wet- en regelgeving rondom het witwassen van geld en het tegengaan van de financiering van terrorisme (AML / CFT). De GCB heeft ook als taak het bevorderen van verantwoord gokken ‘Responsible Gaming’.

May 08
Love0

20 aña servisio di departamentu Speransa

By Novedat

20 aña servisio di departamentu Speransa

Den novèmber 2002 a sera e úniko sentro di rehabilitashon profeshonal na Kòrsou, mihó konosí komo New Start di Pastor Grep. 

Fundashon pa Maneho di Adikshon (FMA) e momentu ei a hañ’e dilanti e realidat ku no tabatin un sentro di rehabilitashon profeshonal riba nos isla. 

Den estrecho kolaborashon ku Stichting De Hoop di Hulanda (ku a manda Dirk de Boer pa fungí komo direktor na Speransa), FMA a logra habri dia 15 di yanüari 2003 un sentro profeshonal na Sabana Cras (Fuik).

Komo e organisashon enkargá ku e parti di kòntròl pa ku tratamentu di adikshon di un forma profeshonal, FMA no por tabatin e sentro bou di su maneho. 

Enkonekshon ku esaki riba 16 di april 2003 a funda Stichting Speransa, di forma ku e maneho di e sentro no a kai mas bou di FMA. E fundashon a keda si bou di e kòntròl direkto di FMA.

Asina Fundashon Speransa un sentro di rehabilitashon ku ta duna kuido durante 24 ora, e tempu ei dunando tratamentu solamente na hende hòmber ku problema di adikshon a ser funda.

Speransa a kuminsá ku solamente 1 kliente na Sabana Cras. E sentro e tempu ei tabatin un kapasidat pa 12 persona risibí yudansa.

Riba 1 di aprel 2006 e sentro a muda bai na Hoogstraat 51 na Otrobanda. Kuantu di nos ta kòrda ainda e Monumento di Otrobanda. Einan por a tuma un kantidat di 30 kliente pa sigui tratamentu.

Na yanüari 2009 a kuminsá brinda e oportunidat pa hende muhé tambe por kuminsá risibí tratamentu. Esaki a bin ku su retonan, sinembargo Speransa a bai pa esaki.

Komienso di yanüari 2015 pa motibu ku gobiernu a redusí e subsidio, a baha e kantidat di klientenan ku por a ser tratá na 15 kliente.

Na yanüari 2015 a kuminsá na Speransa ku e tratamentu semi-residensial pa e klientenan. Kaminda banda di e opshon di keda interná, tabatin e opshon pa klientenan ku por sigui un tratamentu mitar dia di 9’or pa 12’or. 

Den mesun yanüari 2015 aki a kuminsá tambe ku tratmentu residensial i semi-residensial pa hóbennan di 12 pa 18 aña. Kual tambe tabata un reto agradabel pa Speransa.

Despues nos ta yega na aña 2018. E aña 2018 tabata un aña desisivo i di hopi kambio pa Speransa. Esaki komo gobiernu a bolbe kòrta den e subsidio ku tabata risibí.

Esaki a hiba na diferente desishon i kambionan grandi pa ku Speransa. Kual ta e siguientenan.

  • Den mart 2018 Speransa a hañ’é ta stòp ku e departamentu di hóben. Esaki tabatin komo konsekuensha ku mester a tuma despedida di algun trahadó.
  • Tabatin algun trahadó ku a ser trasladá pa otro departamentu.
  • Banda di esaki pa Speransa por a sigui dilanti i garantisá su eksistensia, e tabatin mester di yudansa. P’esei na ougùstùs 2018 Speransa a ser integrá den FMA. 
  • Di Fundashon Speransa a kambia bira FMA Speransa.
  • Na novèmber 2018 Speransa a muda pa e kas aktual na kaya Elisha. Ku por bisa sin duda algun di ta brinda e klientenan un ambiente trankil.
  • E kantidat di kliente ku por risibí yudansa a ser redusí na 10 kliente.

Durante e 20 añanan Speransa a pasa dor di hopi retonan, sinembargo semper a keda lucha pa sigui brinda e oportunidat pa e personanan ku mester di e guia i yudansa residensial i/òf semi-residensial por keda ku e posibilidat pa risibí esaki.

Esaki pa por sigui duna un speransa na kada un persona ku problema di adikshon.

Nos ta yama na promé luga Dios danki pa su intervenshon i yudansa durante tur e añanan tras di lomba i ta pidié pa e sigui yuda nos.

Tambe nos ke yama danki na kada un kliente, famia, instansha/kompanianan ku a duna nos e oportunidat i konfiansa pa por a yuda nan.

Anto last but not least nos ta yama danki na kada un trahadó ku a forma parti na Speransa, ku di un forma òf otro a kontribui, a pone su granito pa yuda i kontribui na e trabounan i alabes eksistensia di Speransa.

  • IMG_7996
  • IMG_8044
  • IMG_8173
May 08
Love0

25 aña servisio di Dios Yudami

By Novedat

25 aña servisio di departamentu Dios Yudami

Nos ta agradesido i kontentu di por a selebrá den un seno chikí huntu ku klientenan i algun kolega i eks koleganan e echo ku e servisio ku departamentu Dios Yudami ta ofresé ta eksistí ya pa 25 aña kaba.

Nos por a pensa bèk kon tur kos a kuminsa i tambe para ketu riba plannan pa futuro pa departamentu Dios Yudami.

Dec 28
Love2

Gaming

By Kustumbernan adiktivo

Gaming

Gaming ta un forma di hunga interaktivo entre hende i kòmpiuter ku ta sosodé di un forma digital riba aparatonan elektróniko manera kòmpiuter, tèblet, telefòn òf e ‘game console’ mes manera Playstation, Xbox, Nintento, Wii. Gaming por tuma lugá tantu online i offline.

 Online ta enserá ku e usuario:

  • Ta konektá na internèt.
  • Por kumpra/ download weganan digitalmente sin mester di un CD.
  • Por kompetí ku hendenan rònt mundu mientras ta konektá na internèt.

 Offline ta enserá ku e usuario:

  • No mester ta konektá na internèt.
  • Lo kumpra wega den forma di un CD por ehèmpel.
  • Por kompetí ku amiga/unan personalmente den e mesun espasio sintá.

 

Bentahanan di gaming

Hungando moderá/ kontrolá, gaming por tin diferente efekto positivo den e usario su bida. Gaming por trese diferente bentaha riba diferente area pa e usuario manera:

Area kognitivo:
Tin weganan ku ta mehorá konsentrashon i atenshon. Weganan ku hopi akshon por asta yuda bo pensa adelantá i reakshoná lihé. E usario por siña tambe:

  • Abilidat pa orientá i posishoná den un ambiente,
  • Kapasidat pa analisá,
  • Plania,
  • Abilidat pa resolvé problema,
  • Pensa solushonnan kreativo,
  • Tuma desishon lihé,
  • Abilidat pa hasi diferente tarea pareu,
  • Kordinashon di man i wowo.

Area sikológiko:
Weganan ta trahá di tal forma ku e usuario ke hasi mas esfuerso pa por bira kada bia mas mihó. Weganan ta reta e usuario i alabes dun’é rekompensa i lag’é sinti éksito.
E echo ku e usuario ta bira kada bia mas mihó den e wega i ta logrando metanan di e wega, por subi su konfiansa propio.
Di e otro banda, e usuario ta siña tambe kon pa dil ku frakaso i ta yud’é subi su perseveransia.

Area emoshonal:
Un bentaha ku hopi usuario ta menshoná ta e echo ku e weganan ta plasentero. Gaming por yuda drecha beis i tambe e usuario por sinti su mes relahá i ta baha strès. Naturalmente por sosodé tambe ku e usuario ta rabia, zundra, te asta kibra su controller. Pasó banda di e parti plasentero, gaming por trigger/ saka hopi emoshon negativo manera:

  • Frustrashon,
  • Miedu,
  • Tristesa,
  • Nèrvio.

Gaming por yuda e usuario siña kon pa dil ku e emoshonnan aki mas mihó. Si e usuario keda rabiá, e chèns ta grandi ku e ta keda hasi e mesun fayonan òf ku e ta bai hunga mas malu. Si e usuario aseptá ku el a pèrdè i purba wak e situashon di otro manera, e por yud’é hunga mas mihó pa e por solushoná e problema òf logra e meta di e wega.

Area sosial:
Gaming ta un manera fásil pa drenta den kontakto ku hende di diferente edat na diferente parti di mundu. E usuario ta siña:

  • Krea amistat nobo,
  • Reinforsá amistatnan eksistente,
  • Traha huntu,
  • Yuda otro,
  • Komuniká ku otro,
  • Tuma liderasgo,
  • I asta siña idioma nobo.

E punto prinsipal ta ku gaming por yuda un persona desaroyá diferente abilidat ku e por usa tantu na skol, trabou i den su bida diario. No opstante, gaming por sali for di kòntròl ku ta pone ku riba e mesun areanan ariba menshoná, e usuario por eksperensiá desbentahanan di gaming.

Kiko ta/por hasi gaming adiktivo?

  • E wega tin bia no tin final, e ta keda bai nivel mas haltu ketu bai.
  • Tin wega ku ta baha bo di nivel si bo keda un kantidat di dia sin hunga.
  • Mas di nivel bo subi, mas efekto bo ta haña òf mas avatar, mas arma, etc.
  • Bo ta haña premio den e wega.
  • Si bo keda un kantidat di ora/ dia sin subi, e wega mes ta manda notifikashon pa bisa bo ku sea nan a sinti bo falta òf ku nan tin un reto pa bo.
  • E echo ku bo por ta konektá ku mundu si ta trata di online gaming, por hasié atraktivo pa kompetí i papia ku otro gamer internashonal, anto nan ta hende di bèrdat.

Desbentahanan di gaming

Na momento ku nos ta papia di desbentaha ta ora ku e uso ya ta saliendo òf a sali for di man. Na momento ku bon dimas ta bira malu. E gamer ta kuminsá eksperensiá efektonan negativo den su bida. Algun ehèmpel ta:

  • Kondishon físiko di e gamer ta bai patras dor ku e ta sintá ta hunga kual por dun’é doló di lombra, skouder i garganta, i e por haña problema ku bista.
  • Otro areanan di bida por bai atras dor di dediká mas tempu na gaming. (Manera skol, trabou, amistatnan…)
  • Menos tempu pa kontakto i aktividatnan sosial den bida real.
  • Dor ku e usuario ta hopi isolá e tin tiki kontakto ku famia i amistat, esaki por resultá den problema den relashon familiar i di amistat ku por trese diskushon, pleitamentu i tenshon.
  • Tin bia e usuario ta hunga asina tantu ku ta pone ku e no ta bai hasi otro aktividatnan sosial importante manera skol, deporte, su hòbinan i sali.
  • Dor di hunga hopi ora tin bia te mardugá òf e siguiente mainta, e usuario por hañ’é ku problema ku drumimentu. E tenshon i eksitashon di gaming ta pone ku bo kurpa i mente ta keda alerta. Banda di esei, e lus di e pantaya ta laga bo kurpa kere ku ahinda no ta anochi i bo kurpa no ta krea menatonina i lo bo no bai sinti soño.
  • E usuario por tin menos atenshon pa su kuido i higiena personal. Por sosodé ku e ta keda sin baña òf ta baña lihelihe, keda sin kambia paña, òf no ta skeiru djente.
  • Ta hunga pa hopi ora largu sin kome un kuminda nutritivo, keda sin kome of no kome na ora. (Kisas e ta skohe pa sinta ku kumindanan prosesá i paketá pa ta mas fásil pa e sigui hunga. Esaki por ta saku di chips, buskuchi, etc)
  • Gaming por pone un hende skapa for di su bida real, esaki por hib’é ahun mas leu for di e bida real ku por lage sinti soledat, depreshon i pensamentu di suisidio.
  • E usuario no por regulá emoshonnan negativo ku e ta sinti, ku por resultá den agresividat, frustrashon i ansiedat.
  • Un problema ku ta tumá lugá hopi ta bullying. Debí ku tin kompetensia, hungadónan por tenta otro i esaki or hiba na un imagen propio abou i depreshon.
  • Gasta sèn tambe ta un desbentaha di gaming kaminda e usuario ta keda paga pa posibel upgrades òf efektonan spesial den e wega. Tin algun di e kompras ku por parse guèmbelmentu.

Tipo di gamer

Gamer profeshonal
Gamer sosial i responsabel
Gamer problemátiko

Ki ora mi ta adikto na gaming?

Si bo ta pasa hopi tempu ta hunga, esaki no ta nifiká outomatikamente ku bo tin adikshon. Adikshon na gaming ta keda yama Internet Gaming Disorder (IGD). Pa por diagnostiká esaki, tin algun kriteria ku sigur 5 di nan e persona lo mester ta eksperensiá den e delaster aña:

  1. Pensa konstantemente riba gaming.
  2. Haña síntoma ora bo no ta hunga, manera sinti tristesa, rabia, irita, laf, nada no ta leuk mas.
  3. Toleransia; bo ta bai invertí kada biaha mas tempu den gaming.
  4. Bo ta purba di stòp òf hunga ménos pero bo no ta logra.
  5. Bo no ta interesá mas den otro kosnan den bida manera bo hòbinan i/ òf aktividatnan sosial.
  6. Bo ta sigui hunga hopi, ounke bo ta eksperiensiá konsekuensianan negativo den bo bida.
  7. Bo ta gaña tokante kuantu ora bo ta hunga.
  8. Gaming a bira un forma di skapa for di emoshonnan negativo manera miedu, tristesa, rechaso, etc.
  9. Bo relashonnan, trabou i skol ta na peliger dor di bo komportashon di gaming.

Dikon un hende por bira adikto na gaming?

E motibunan dikon un hende por bira adikto, ta dependé di e persona mes i su ambiente. E mundu virtual di gaming ta ofrese varios posibilidat manera:
1. Satisfakshon inmediato di algun nesesidat humano, manera kontakto sosial, rekonosementu, outonomia i kompetensia.
2. Posibilidat pa skapa di e mundu i bai den e mundu virtual kaminda tur kos por i kaminda bo por skapa di bo problemanan diario.
3. Bo por keda anónimo i krea bo personahe perfekto.

Banda di esei, tin hende ku ta vulnerabel pa adikshon. Algun faktor ku por hasi un hende vulnerabel ta por ehempel, konfiansa propio abou, soledat, timides i falta di abilidat sosial. Tambe tin hende ku ta hopi sensitivo pa rekompensa ku gaming ta duna i nan ta haña mas difísil pa kontrolá nan deseo pa hunga.

E ambiente tambe por hunga un ròl den e desaroyo di adikshon. E persona tin sufisiente alternativa pa rekreá su mes? E ambiente direkto (mayor/ edukado) ta pone algun regla pa gaming?

Algun tep pa prevení adikshon na gaming:

  1. Stipula e kantidat di ora pa dia ku bo ta bai game delanta.
  2. Registra kuantu ora pa dia realmente bo a hunga.
  3. Traha palabrashon entre mayor i yu kuantu ora máksimo e yu mag di hunga pa dia. Por ehèmpel 2 ora pa dia.
  4. Evita di laga e gaming tuma lugá di otro kosnan importante den bida, manera: bo deskanso, bo skol, bo hòbi, bo amigunan, bo trabou i tareanan diario.
  5. Sea un persona sosial den kas. Keda ku kontakto ku miembronan na kas, hasi kosnan gezellig, hasi kosnan huntu ku famia. Ora bo yega kas no bai mes ora tras di bo kòmpiuter di manera ku bo keda alkansabel pa tur hende na kas.
  6. Keda pendiente riba e señalnan di hunga dimas, manera: bira rabia òf iritá ora bo no por hunga, keda pensa hopi riba gaming i pèrdè hopi tempu den gaming.

 

Dikshonario di gaming

Dikshonario di gaming:

  • Skins:
  • Avatar:
  • Flow:
  • Massive multiple online games:
  • Massive multiple online role-playing games:
  • First Person shooter:
  • Lootboxes:
  • Twitch:
  • Grooming:

Tèst bo mes

Tèst bo mes:

  • Skins:
  • Avatar:
  • Flow:
  • Massive multiple online games:
  • Massive multiple online role-playing games:
  • First Person shooter:
  • Lootboxes:
Dec 28
Love0

Wega di plaka

By Kustumbernan adiktivo

Wega di plaka

Wega di plaka hopi biaha ta kuminsá komo un aktividat pa dibertí i pasa prèt. Mayoria hende por gèmbel na un manera responsabel: por ehèmpel segun por nan ta kumpra number. Òf den wikènt nan ta bai nan ‘bon kuné’ òf bingo. No tin nada malu den purba bo suerte de bes en kuando.

Pero pa sierto hende wega di plaka no ta algu asina inosente mas: tin hende no por biba mas sin e ‘sensashon’, e kick, di wega di plaka. E kick ta sali for di e tenshon di gana òf pèrdè. E persona adikto ta lubidá tur kos ku ta rònt di dje anto e ta bira un ku e wega. E tenshon i emoshon ku e gèmbelmentu ta dun’é ta meskos ku e high di un persona bou di efekto di alkohòl òf droga. E high ta yuda tapa tur preokupashon i laga e persona sinti’é “bon”. Adikshon na kasino ta hopi peligroso pasobra e ta un adikshon skondí. Ta difísil pa bo sa si un persona ta adikto pasobra por lo general bo no ta ripará nada straño na dje. Ora e persona buska yudansa su problema di wega di plaka por ta hopi serio kaba.

Dikon hende ta hunga wega di plaka?

  • Nan ta kere ku nan por gana hopi sèn fásilmente;
  • Pa dibertishon;
  • Pa hunga grandi den kompania di amigunan;
  • Pasobra amigu(a)nan òf famia ta hunga;
  • Pa aventura i sensashon i e kick ku bo ta sinti ora bo gana;l Pa lubidá òf hui pa problema di tur dia;
  • Pa mata tempu.

Tipo di wega di plaka:

  • Wega di plaka kaminda bo por mira resultado mesora, manera mashin di plaka, remate, wega di kasino, wega di karta, tira dou, raspa i gana, nòk, ’21′, sierto tipo di Sports Betting i wega di number. Den e último añanan gambling via internèt a oumentá.
  • Wega di plaka kaminda bo no sa e resultado mesora, manera brièchi, lòt òf loto.
  • Weganan ku ta duna resultado mesora ta hopi mas adiktivo kompará ku esnan ku no ta duna un resultado inmediato.

Ki ora bo ta adikto na wega di plaka?

Na FMA nos ta usa algun kriterio pa por yega na sa ki ora nos ta papia di adikshon na wega di plaka. Ora bo tin un òf mas di e komportashonnan aki posiblemente bo lo por tin problema ku wega di plaka.

  • Konstantemente bezig ku wega di plaka, sea aktivamente òf mentalmente.
  • Saka montantenan di sèn kada biaha mas haltu pa sinti e kick.
  • Intento(nan) pa stòp òf baha man no ta logra.
  • Intrankil òf iritá ora bo ta purba baha man òf stòp.
  • Bai hunga plaka di nobo pa por kita e problemanan for di bo mente, pa kita angustia, depreshon òf sintimentu di kulpa.
  • Ke gana e sèn bèk ku bo a pèrdè.
  • Gaña famia òf konosínan tokante e kompartashon ku wega di plaka.l Hòrta, gaña òf hasi froude pa por sigui hunga plaka.
  • Problemanan finansiero komo konsekuensia di wega di plaka.

Konsekuensianan di adikshon na wega di plaka

  • Problema finansiero: Un persona ku ta adikto na wega di plaka ta si- gui gèmbel, asta ora e ta den problemanan finansiero grave.
  • Su relashonnan ku famia, amigunan, trabou i/ òf estudio ta bai atras.
  • Problemanan mental: miedu, angustia i kulpa.
  • Ora e persona stòp ku komportashon di wega di plaka e ta haña síntomanan di apstinensia, manera: problema pa drumi, doló den stoma, doló di kabes, atake di pániko, rabia, iritashon i depreshon.

Wega di plaka i e seleber

Dor di e tenshon konstante di gana òf pèrdè e seleber ta produsí un kantidat grandi di dos supstansia: endorfina i adrenalina. Dor di esaki e persona ta sintié “dushi” i e ta eksperensia un kick. E tenshon i e kick ta aktivá e sentro di plaser òf rekompensa den seleber. I e seleber ta produsí un supstansia ku yama dopamina. E dopamina ta laga e persona sinti e sensashon di rekom- pensa òf high. I mas tantu un hende gèmbel, mas dopamina e ta haña i mas plaser e ta sinti.

Tèst bo mes:

Kontestá SI òf NO na kada pregunta aki bou:
1. Bo a yega di sinti ku bo mester baha man ku wega(nan di plaka?
2. Bo a yega di ninga òf skonde bo komportashon di wega di plaka pa otro hende no kritikábo, dor ku bo ta hunga plaka hopi?
3. Dor di bo komportashon di wega di plaka; bo a yega di hañabo den problemanan emoshonal, familiar, ekonómiko òf problema na trabou?
4. Frekuentemente bo ta sinti un gana iresistibel pa bai hunga plaka ounke esaki ta kousa di bo problemanan?

Resultado:

Si bo kontesta tabata SI na dos òf mas pregunta, FMA ta rekomendá bo pa buska yudansa profesional pa evaluá bo kaso mas profundo. Esaki ta posibel na FMA.

Dec 28
Love0

Base

By Supstansianan adiktivo

Base

Kiko ta base?

Base tambe yamá crack ta un derivado for di kokaina. Kokaina ta un droga ku ta bin den forma di un puiru blanku ku ta ser inhalá via di nanishi. Pa e kokaina por bira base e ta pasa dor di un proseso di preparashon. Pa yega na base ta meskla kokaina ku awa, amoniak i bikarbonato di sodio. Tambe sa agregá kímikonan ku ta hopi dañino pa bo seleber i bo órganonan. Esakinan por ta supstansianan manera aceton, gasolin, zür i diferente otro ásido manera esun di bateria di outo. Base ta ser humá/ inhalá via boka.

Kon e ta wòrdu usá?

Base ta wòrdu usá via di un pipa, kuchara òf riba papel di aluminio. E persona ta hinka e base den un pipa, e ta keinta e pipa i inhalá e produkto via di e pipa. Òf e persona ta pone un pida base riba un papel di aluminio anto keinta e produkto bou di e papel di aluminio ku un lighter. E base ta evaporá i e huma ta wòrdu inhalá via boka, via un pipa.

Efekto físko di base

Ora un persona usa base, den un biaha un kantidat di supstansia ta yega na e seleber i e ta hasi un efekto inmediato. E persona ta sinti e efekto di e base despues di 7 pa 10 sekònde ku el a inhal’é. Dor di esei efekto di base ta hopi mas fuerte i e riesgonan dor di uso di base ta mas haltu kompará ku kokaina. Base ta okashoná konsekuensianan manera problema ku kurason i pulmon, problemanan mental i pèrdida di peso. Banda di esei e usadó ta sinti un sensashon di haltu hopi intenso. Usadó di base no ta sinti ora nan ta kansá anto nan ta sigui usa konstantemente te pasa nan límite. Nan ta sigui usa te ora nan ta totalmente agotá.

Efekto mental di base/ dependensia

Base ta oumentá e dopamina den e seleber. Dopamina ta un ‘neurotransmitter’/ mensahero den nos seleber ku ta sòru di aktivá e sistema di plaser. P’esei e persona ta haña un sensashon di haltu i plaser intenso ku un durashon kòrtiku i ta pone ku e dependensia mental ta bira hopi fuerte. Ora e efekto di base baha despues di 5 minüt, e persona ta sinti’é asina malu (crash) ku e ta bai usa mesora pa e skapa for di e sintimentu malu aki.

Banda di heroina i nikotina, base ta un di e supstansianan mas adiktivo ku tin.

Toleransia

Toleransia ta na momentu ku e persona kustumbrá ku e droga i e mester usa un kantidat mas haltu pa alkansá e mesun efekto asina intenso ku e promé biaha. Na e di dos biaha ku e hende usa, ya kaba e efekto ta bira ménos, pues e usadó ta haña un toleransia agudo. E persona ke sinti e mes un efekto i ta p’esei e mester usa un kantidat mas haltu di base.

Síntoma di apstinensia

Síntoma di apstinensia ta na momento ku e usadó no ta usando e supstansia i e kurpa i of mente por rebeldia den forma di algun sintoma manera; sinti sin smak, sinti ‘down’/ kibrá, doló di kurpa, temblamentu, sin apetit, mal beis i nèrvio, no por drumi bon.

Den e periodo aki e persona ta sinti un deseo fuerte pa usa base.

“Overdosis”

E uso di base por hiba un persona na overdosis. I esaki lo por resultá fatal. Un hende por fayesé pa e siguiente motibunan:
1. E uso di base ta sera bo ardunan i arterianan, bo preshon di sanger i por okashoná un ataka selebral i ataka di kurason.
2. Problema ku halamentu di rosea.
3. Ataka di djimpi. Esakinan por ta un tras di otro i dor di esaki e por kousa morto.

Efektonan riba término largu

Banda di okashoná adikshon, e persona lo tin e siguiente konsekuensianan:

  • Base ta iritá i daña garganta i pulmon. Usadónan di base hopi biaha tin doló den pechu. Nan ta tosa hopi i tin doló di garganta. Tin biaha esaki ta kombiná ku un sleim koló maron òf pretu. E funshon di e pulmon ta bai atras i nan por haña bronkítis króniko. E dañonan di pulmon ta bira tin biaha asina grave ku e no ta rekuperá.
  • Base ta baha e gana di kome ku ta pone ku e usadó ta pèrdè peso.
  • Usadó di base tin hopi problema pa drumi i ta sufri di kansansio króniko.
  • Usadó di base tin problema ku lepnan ta bira hopi seku ku por skùr.
  • Base ta dof e garganta i ta pone ku e stèm por bai atras.
  • Tambe nan por haña kimá den nan kara dor ku e huma kayente ku konstantemente ta serka di nan kara.
  • Tin un riesgo haltu ku usadó di base ta bira paranoia, e ta sufri di miedu i depreshon.
Close Menu